Úlfljótur

„Úlfljótur er og hefur verið kórónan á starfsemi Orators, tímarit, sem gengt hefir miklu hlutverki fyrir laganema og lögvísindi á landi hér, tímarit, sem  ávallt hefir verið félaginu til sæmdar og lagadeildinni. Hvergi á Norðurlöndum gefa laganemar út tímarit, sem kemst í hálfkvisti við Úlfljót sem faglegt lögfræðitímarit, og hefir það vakið mikla athygli erlendis“.

Ármann Snævarr, prófessor, 1986

Úlfljótur, tímarit laganema, hefur verið gefið út lengst allra tímarita við Háskóla Íslands. Fyrsta tölublað þess leit dagsins ljós í lok febrúarmánaðar árið 1947. Frá þeim tíma hefur tímaritið verið gefið út á hverju ári, að undanskildu árinu 1951, og orðið efnismeira með hverju árinu sem líður.

Stofnun Úlfljóts var verk þáverandi formanns Orators, Þorvaldar Garðars Kristjánssonar.  Stofnun nýrra nemendablaða var ekki nýmóðins á þeim tíma og var því tímaritinu viðtekið með fyrirvara, voru sumir úrtökumenn svo brattir að þau orð féllu að fyrsta heftið væri einnig það síðasta. Stofnfé tímaritsins voru einnungis 35 aurar, en þó var blaðinu dreift til allra laganema og lögfræðinga í landinu þeim að kostnaðarlausu.

Við stofnun Úlfljóts hafði Þorvaldur leitað sér aðstoðar og styrks hjá dr. Ólafi Lárussyni, þá elsti prófessorinn hér við deild. Það var einmitt Ólafur sem lagði til nafnið „Úlfljótur“, en það var ekki í fyrsta skipti sem nafnið bar á góma laganema. Árið 1928 urðu miklar deilur um hvort að hið nýja laganemafélag ætti að bera nafnið Orator eða Úlfljótur, svo varð að hinu þjóðlegu urðu undir gagnvart hinum latínu-lærðu og hlaut félagið nafnið Orator.    

Forsíða blaðsins hefur frá upphafi verið umdeild, en hún skartar teikningu Örlygs Sigurðssonar. Stíll myndarinnar hefur verið lýst sem „léttur og leikandi, í raun spauglegur, sem gefur verkinu dýpri merkingu“.  Ástfóstur laganema og lögfræðinga við forsíðu Úlfljóts er slík að þegar ritstjóri 45. árgangs lét breyta henni urðu viðbrögð laganema og lögfræðinga svo hávær að forsíðunni var breytt aftur til síns fyrra horfs.

Við stofnun Tímarits lögfræðinga, árið 1951, töldu sumir að lífdagar Úlfljóts væru taldnir. Forsvarsmönnum tímaritsins var meðal annars boðið að birta efni sitt í sérstökum kafla í hinu nýja tímariti og tal barst að sameiningu. Unnu þó margir gegn þessum fyriráætlum, en dr. Ármann Snævarr viðurkenndi árið 1986 í ritinu „Saga Orators“ að hann hafi „leynt og ljóst [unnið] gegn þeirri hugmynd og raunar af alefli“.

Í dag er Í Úlfljóti er að finna vandaðar greinar um íslenska sem og alþjóðlega lögfræði auk þess sem þar er að finna umfjöllun um það sem er efst á baugi í lögfræði hverju sinni. Þar eru m.a. reifaðir nýjustu dómar Hæstaréttar, fjallað um ný fræðirit á sviði lögfræði og greint frá helstu tíðindum sem berast frá Alþingi svo fátt eitt sé nefnt. Í tímaritinu eru og fluttar fregnir af hinu stranga og áhugaverða laganámi sem og hinu viðburðaríka starfi félagsstarfi Orators og Úlfljóts. Flestir höfundar eru lögfræðingar eða laganemar en auk þeirra hafa fjölmargir aðrir, sem láta sig lögvísindi varða, ritað greinar í Úlfljót.

Á hverju ári eru gefin út fjögur tölublöð og er hægt er að gerast áskrifandi að Úlfljóti á heimasíðu Úlfljóts. Áskriftargjald er kr. 2.900 m.vsk. á ári. Félagsmenn Orators fá þó tölublöðin sér að kostnaðarlausu.

Þá starfrækir Úlfljótur fræða- og rannsóknasjóð, Fræðasjóð Úlfljóts. Markmið sjóðsins er að efla fræðastarf og rannsóknavinnu á sviði lögfræði, sérstaklega meðal laganema og kennara við lagadeild Háskóla Íslands. Þau verkefni sem styrkt eru af sjóðnum þurfa að vera sjálfstæð rannsóknarverkefni umsækjandans. Mikill vilji er innan Úlfljóts að birta efni laganema við lagadeild Háskóla Íslands, þó það sé auðvitað á forræði hvers ritstjóra, en með Fræðasjóðnum er reynt að koma til móts við laganema einmitt svo að svo megi verða, enda sé það eitt aðal hlutverk tímaritsins. Betra tækifæri til birtingar á fræðigreinum laganema finnst varla á Norðurlöndum.

Ennfremur er nú árlega haldinn sérstakur hátíðisdagur Úlfljóts, sem ætlað er að vera eins konar mótvægi við árshátíð Orators. en hugmyndina að deginum fengu þáverandi framkvæmdastjórar, Einar Björgvin Sigurbergsson og Jóhannes Eiríksson.  Hefur hátíðsdagur Úlfljóts verið haldinn síðan 2005 og því skipað sér rækilega í sessi í félagslífi laganema og talinn með merkari atburðum hvers vetrar.

Um árabil hefur Úlfljótur rekið bóksölu í kjallara Lögbergs. Framkvæmdastjórar Úlfljóts fara með stjórn bóksölunnar, venju samkvæmt. Bóksalan býður nú upp á rúmlega 130  rit er varða lögfræði, en úrvalið hefur aukist jafnt og þétt undanfarin ár. Meginmarkmið bóksölunnar er annars vegar lægra vöruverð en gengur og gerist hjá öðrum bóksölum og hins vegar traust þjónusta í þágu laganema. Bóksalan er með vökult auga fyrir hvers konar verðbreytingum kennslurita og tekur ávallt mið af þeim í verðlagningu sinni. Óhætt er að segja að laganemar, sem og aðrir viðskiptavinir, spari sér umtalsverða fjármuni með því að beina viðskiptum sínum til bóksölu Úlfljóts.

 „Ég hef hugsað sem svo að Úlfljótur hafi unnið sér þann þegnrétt að það sé óhugsandi að vera án hans, bæði fyrir lagadeildina svo og lögvísindin í landinu.“

Þorvaldur Garðar Kristjánsson, stofnandi og ritstjóri, 1997

 Tekið saman af William Fr Huntingdon-Williams, laganema og framkvæmdastjóra Úlfljóts