Fréttir

Kokteilar á föstudaginn

Tue, 09 Mar 2010 13:23:00 +0000

Ágætu laganemar,

Við minnum meistaranema á að skrá sig í kokteil á morgun kl: 12:00

Því miður er kokteil í VÍS aflýst en í staðinn mun Orator bjóða BA nemum á 1-3 ári í kokteil í fóstbræðraheimilinu kl. 17:30 á föstudaginn.
Kokteilinn verður mjög glæsilegur og komast 50 manns að. Boðið verður uppá veigar fyrir kvöldið og við minnum á dresscode Orators.
Skráning byrjar á morgun kl. 12:00.

Við minnum á að skráningar fyrir kl. 12:00 eru ekki gildar.

Við hvetjum alla til að mæta á Apótekið á fimmtudagskvöldið kl. 19:00 til að fylgjast með Orator vinna fyrstu stigin sín á Orator-mágus í spurningarkeppni og skák.

Gleði gleði! Allir að mæta á föstudaginn!

Stjórn Orators

ESB og ungt fólk: Hvað græðum við á aðild?

Tue, 09 Mar 2010 08:30:00 +0000

Málfundur um ungt fólk og ESB - English version below

Ísafold - ungt fólk gegn ESB-aðild, í samstarfi við Orator, félag laganema við HÍ boða til málfundar um ungt fólk og Evrópusambandið fimmtudaginn 11. mars næstkomandi í sal 101 á Háskólatorgi kl. 11.40-12.20

Yfirskrift fundarins er ,,Ungt fólk og ESB - hvað græðum við á aðild?". Ræðumenn verða þau Maria Elvira Mendez, dósent í evrópurétti, Magnús Árni Magnússon, aðjúnkt í stjórnmálafræði, og Tale Marte Dæhlen, formaður Ungdom mot EU í Noregi.

Hvert þeirra mun halda um 10 mínútna erindi. Erindin fjalla um áhrif mögulegrar aðildar Íslands að ESB á ungt fólk með áherslu á menntun, lýðræði, atvinnu/atvinnuleysi og fleiri málefni sem snúa að hagsmunum ungs fólks.

Ræðumenn, sem hafa mismunandi skoðanir á þessum málaflokki, munu í erindum sínum leitast við að svara því hvers vegna eða hvers vegna ekki ungt fólk ætti að vilja ganga í ESB. Í lok erindanna verða fyrirspurnir leyfðar úr sal.

Fundurinn verður á ensku

English version:

A forum on young people and the EU will be held on Thursday, the 11th of March in room 101 in Háskólatorg from 11.40 to 12.20.

The topic is, ,Young people and the EU - what's in it for us?" and the speakers will be Maria Elvira Mendez Pinedo associate professor in law, Magnús Árni Magnússon adjunct in political science and Tale Marte Dæhlen leader of Ungdom mot EU in Norway.

The speakers will each give a 10 minute speech .The speeches will be on the effects of Iceland's possible EU-membership on young people, regarding education, democracy, employment/unemployment and other interests of young people. The speakers, who have different views on the matter, will in their speeches, try to answer the question why young people should or should not want to join the EU. After the speeches, questions from the audience are allowed.

The forum will be in English

Myndir frá Árshátíð Orators 2010

Mon, 08 Mar 2010 17:37:00 +0000

Myndir frá árshátíð Orators og fleiri viðburðum eru komnar á innra net Orators. Afgangur af myndunum er væntanlegur á næstu dögum

http://orator.is/myndir/

Vel heppnuð málflutningskeppni ORATORS

Sun, 07 Mar 2010 20:43:00 +0000

Tvö lið öttu kappi í málflutningi fyrir fullskipuðum dómi dómþings Orators í Hæstarétti Íslands um helgina. Var það mál manna að keppendur hafi staðið sig einstaklega vel en keppnin var í senn jöfn og spennandi og komu bæði keppendur og dómarar vel undirbúnir til leiks.

Málið var meiðyrðamál þar sem deilt var um fréttaflutning er varðaði einkalíf Sigfúsar Guðmundssonar, starfsmanns á lánasviði Fjármálaeftirlitsins. Stóð annað liðið uppi sem sigurvegari en auk þess var málflutningsmaður Orators valinn, sem var sá einstaklingur sem stóð sig best að mati dómara.

Gunnlaugur Helgason, laganemi á 3. ári, vann titilinn málflutningsmaður Orators og mun hann bera titilinn næstu tvö árin, en keppnin er haldin annað hvert ár.

Sigurliðið, sem kallaðist því frumlega nafni „Lið I“, var skipað: Friðriki Árna Friðrikssyni, Guðrúnu Eddu Finnbogadóttur, Guðnýju Hjaltadóttur, Gunnari Jónssyni og Vilhjálmi Þór Svanssyni. Gunnlaugur var í Liði II sem laut í lægra haldi fyrir Liði I, en það var auk Gunnlaugs skipað Hilmari Þorsteinssyni, Ólafi Agli Jónssyni og William Frey Huntingon-Williams. Mjótt var á munum og voru dómarar ekki einhuga um úrslitin.

Ólafur Börkur dró fram „vélbyssuna“

Dómurinn var óvæginn við keppendur og hlífði þeim ekki við snúnum spurningum á meðan málflutningi stóð. Það var þó mat dómara að allir keppendur hafi staðið sig með afbrigðum vel og borið sig fagmannlega við málflutninginn í alla staði. Dómarar voru Ólafur Börkur Þorvaldsson, hæstaréttardómari, Þorgeir Ingi Njálsson og Helgi I. Jónsson, dómstjórar, og Kristín Benediktsdóttir og Eiríkur Jónsson, kennarar við lagadeild HÍ. Ólafur Börkur komst þannig að orði að hann hefði dregið fram vélbyssuna á keppendur en með því átti hann við spurningaflóð dómsins til keppenda.

Dómurinn leit til flutnings liðanna og rökstuðnings þeirra auk þess sem skrifleg gögn s.s. stefna og greinargerð voru tekin með í reikninginn.

Sigurliðið hlaut að verðlaunum bókina „Mannréttindasáttmálar Sameinuðu Þjóðanna“ sem er nýjasta rit bókaútgáfunnar Codex.

Hér eru myndir frá keppninni: http://orator.is/myndir/album/Mlflutningskeppni-Orators

Hér má sjá frétt mbl.is um keppnina:

http://mbl.is/mm/folk/frettir/2010/03/06/laganemar_kepptu_i_malflutningi/

Orator-mágus dagurinn

Sun, 07 Mar 2010 14:43:00 +0000

Kæru laganemar.

Nú er komið að því að reima á sig skóna og byrja að hita upp fyrir einn af
stórviðburðum ársins!

ORATOR vs. mágus

Þessi keppni sem haldin hefur verið árlega frá því elstu menn muna byrjar
með æsispennandi skák og spurningakeppni á fimmtudagskvöldið kl. 19:00 á
Apótekinu. Fjölmennum þangað og tökum þjófstart á gleðina.

Á föstudaginn verður svo keppt í handbolta, körfubolta, knattspyrnu og
reipitogi. Keppnin verður haldin í Frostskjóli (KR heimilinu). Þar etja
kappi Orator valkyrjurnar og víkingarnir gegn smælingjunum í mágus.
Keppnin byrjar á slaginu 11:00 og eru áhorfendur hvattir til þess að mæta
og styðja Orator í baráttunni.
Að lokinni keppni er haldið í kokteila.

BA nemar á 2 og 3 ári halda í kokteil til vátryggingarfélags Íslands, VÍS.
Skráning hefst á miðvikudaginn 10. mars kl. 12:00 á heimasíðu Orators.
Vátryggingafélag Íslands hf. (VÍS) er í dag stærsta tryggingafélag
landsins og á djúpar rætur í íslensku samfélagi.
VÍS varð til árið 1989 við samruna Brunabótafélags Íslands (stofnað 1917)
og Samvinnutrygginga (stofnað 1946). Fyrirtækið stundar almenna
tryggingastarfsemi og býður alhliða tryggingalausnir fyrir einstaklinga,
fjölskyldur, fyrirtæki, sveitarfélög og stofnanir.

Mastersnemum er svo boðið til OPUS lögmanna. OPUS lögmenn er traust
lögmannsstofa sem leggur áherslu á að veita viðskiptavinum sínum
áreiðanlega og persónulega þjónustu. Þar vinna lögmenn saman að
hámarksárangri í sérhverju máli. Viðskiptavinir OPUS lögmanna eru bæði
einstaklingar og fyrirtæki.Á einstaklingssviði búa lögmenn yfir mikilli
reynslu og kunnáttu í málum vegna umferðar- og vinnuslysa. Á
fyrirtækjasviði hefur OPUS meðal annars víðtæka sérþekkingu og reynslu af
hverskonar málum er varða hlutafélög, samruna og samkeppni fyrirtækja. Þá
býr stofan yfir mikilli þekkingu á fasteignamálum og skipulags- og
byggingarmálum. Skráning í heimsókn til OPUS lögmanna hefst kl. 12:00 þann
10. mars

Við minnum á að skráningar fyrir kl. 12:00 eru ekki gildar.

Eftir kokteilana verður haldið í Fóstbræðraheimilið á Langholtsvegi 9. Þar
munu ræðuskörungar og drykkjuhrútar Orators sýna mágus hvar Davíð keypti
ölið! Að lokum mun sigurvegarinn verða krýndur en þess má geta að Orator
hefur unnið þessa keppni ein 8 ár í röð. Bjór verður á staðnum en fólki er
einning frjálst að mæta með eigin veigar. Eftir að keppni lýkur mun Rútur
ferja okkur í miðborgina þar sem gleðinni verður áframhaldið.

Ef þú, lesandi góður, telur þig geta veitt okkur liðveislu í ofantöldum
greinum þá máttu endilega hripa niður nafn og símanúmer og senda á
Íþróttajöfra Orators:

Davíð Ingi: dim1@hi.is
Fjölnir: fjv1@hi.is
Gestur: geg14@hi.is

Í hádeginu á fimmtudaginn mun svo undankeppni fyrir bjórþambið fara fram í
félagsherbergi Orators, a.k.a. Fredagsbarnum. Keppnisfyrirkomulagið mun
verða kynnt á staðnum.

Að lokum hvetjum við alla sem vettlingi geta valdið að mæta í/á :
- Apótekið á fimmtudag kl. 19:00
- Frostaskjól (KR heimilið) kl. 11:00 á föstudagur
- Fóstbræðrasalinn eftir kokteila eða kl. 20:00

ÁFRAM ORATOR...!

Fyrir þá sem eru með athyglisbrest: ORATOR - mágus - reima skóna -
Apótekið - Frostaskjól - Fóstbræðraheimilið - ræðukeppni - drykkjukeppni -
sigur - DJAMM!

Kveðja,
Íþróttajöfrar og stjórn Orators.

Bláa lónið - Vorferð

Fri, 05 Mar 2010 12:33:00 +0000

Þeir sem eru að fara í vorferð Orators eru minntir á mætingu í Lögberg kl. 16:15 og taka með sér Orator skírteinið sitt.

Málflutningskeppni Orators 2010

Thu, 04 Mar 2010 12:36:00 +0000

Málflutningskeppni Orators fer fram á laugardaginn, 6. mars., kl. 10 í Hæstarétti Íslands.

Mætið og fylgist með sleggjum framtíðar stíga sín fyrstu spor í málflutningi!

Laganemar eru hvattir til að mæta og fylgjast með keppninni. Tvö lið reyna fyrir sér í málflutningi og dómurinn er skipaður hæstaréttardómurum og tveimur kennurum lagadeildar. Keppendur eru laganemar af 3. og 4. ári lagadeildar og því hvetjandi að fá sem flesta áhugasama áhorfendur.

Keppnisliðin eru þannig:

Lið I:

Friðrik Árni Friðriksson

Guðný Hjaltadóttir

Guðrún Edda Finnbogadóttir

Gunnar Jónsson

Vilhjálmur Þór Svansson

Lið II:

Gunnlaugur Helgason

Hilmar Þorsteinsson

Ólafur Egill Jónsson

William Freyr Huntingdon-Williams

Poolmót Orators

Tue, 02 Mar 2010 11:22:00 +0000

Íþróttajöfrar Orators eru stoltir að kynna, Poolmót Orators!

Mótið verður haldið á snóker og poolstofunni lágmúla 5, klukkan 20:00
næstkomandi fimmtudag, 4. mars.

Margar gamlar sleggjur hafa hreppt titilinn á undanförnum árum. Ertu
verðandi sleggja? Skráning hafin á netfangið, dim1@hi.is

Kveðja,
Íþóttajöfrar Orators

Andlát

Wed, 24 Feb 2010 20:10:00 +0000

Hörður Heimir Sigurðsson, samnemandi okkar við lagadeild Háskóla Íslands, lést þann 21. febrúar sl. Ekið var á Hörð Heimi við gatnamót Vegamótastígs og Laugavegs, laugardaginn 24. janúar 2009, með þeim afleiðingum að Hörður Heimir hlaut alvarlega höfuðáverka. Orator, félag laganema við Háskóla Íslands vottar fjölskyldu Harðar Heimis samúð sína.

Kokteilar á föstudag, poolmót og sameiginlegt djamm!

Tue, 23 Feb 2010 16:32:00 +0000

Kæru laganemar,

Stjórn Orators þakkar fyrir góða árshátíð!
Við slökum að sjálfsögðu engann veginn á djamminu og núna á föstudaginn
höldum við í kokteila. Að loknum kokteilum geta laganemar valið milli
tveggja spennandi möguleika. Nr. 1 er að fara á hið árlega Poolmót Orators
sem íþróttajöfrar halda. Nr. 2 er að mæta á sameiginlegt djamm með Mágus,
félagi viðskiptafræðinema, Politicu félagi stjórnmálafræðinema og Ökonomiu
félagi hagfræðinema!
Rútur munu ferja laganema á báða staði að loknum kokteilum.

2-3 árið mun á föstudaginn halda í heimsókn í Auði Capital.
Auður Capital veitir fjárfestingatengda þjónustu, þar með talið
eignastýringu og vörslu séreignarsparnaðar, fyrirtækjaráðgjöf og rekstur
fagfjárfestasjóða.
Auður Capital var stofnað árið 2007 með það að markmiði að auka jafnvægi
og fjölbreytni í fjármálaþjónustu.
Skráning í kokteilinn hefst á morgun kl. 12:00

4-5 árið fer í heimsókn á Lögfræðistofu Reykjavíkur.
Lögfræðistofa Reykjavíkur er ein af stærri lögmannsstofum landsins og
veitir alla alhliða lögmannsþjónustu. Hjá stofunni starfa nú átta
hæstaréttarlögmenn, fimm héraðsdómslögmenn, tveir lögfræðingar og tveir
laganemar ásamt öðru starfsfólki.

Lögfræðistofa Reykjavíkur leggur metnað sinn í að veita framúrskarandi
lögmannsþjónustu fyrir fyrirtæki, sveitarfélög, stofnanir jafnt sem
einstaklinga. Í ört vaxandi alþjóðavæðingu þá hefur Lögfræðistofa
Reykjavíkur lagt sig fram við að sinna umbjóðendum sínum jafnt hérlendis
og erlendis og sem liður í þeirri þróun þá hefur stofan um árabil verið
aðili að stærstu samtökum lögmannsstofa í Evrópu, "The Association of
European Lawyers"

Skráning hefst á morgun kl. 12:00

Hægt er að skrá sig á morgun með að smella á eftir farandi slóð:
http://orator.is/skraningar/

Þetta kvöld verður eitt af þessum stóru hjá Orator og við hvetjum alla
til að mæta!!

Stjórn Orators

Hátíðarmálþing Orators

Thu, 11 Feb 2010 12:40:00 +0000

Hátíðarmálþing Orators verður haldið á hátíðardegi félagsins 16. febrúar 2010. Málþingið verður að þessu sinni tileinkað 90 ára starfsafmæli Hæstaréttar Íslands.

Frummælendur á málþinginu verða:

Ingibjörg Benediktsdóttir, forseti Hæstaréttar: Ávarp í tilefni 90 ára afmælis Hæstaréttar.

Ragna Árnadóttir, dóms- og mannréttindaráðherra: Skipan dómara og nýtt frumvarp þess efnis.

Jakob R. Möller, hæstaréttarlögmaður: Stormur tíðarinnar: Hæstiréttur og samfélagið.

Fundarstjóri verður Hjalti Geir Erlendsson, stud.jur, funda- og menningarmálastjóri Orators.

Málþingið hefst kl. 13:00 og stendur til 15:30 í hátíðarsal Háskóla Íslands (aðalbygging). Aðgangur er ókeypis og að erindum loknum verður boðið upp á léttar veitingar.

Laganemar á öllum árum eru hvattir til að mæta. Fátt slær því við að næra andann áður en haldið er á vit (b)ölsins á árshátíð Orators. Í viðreynslu er fátt vænlegra en að vitna í orð mikilmenna. Stjórn Orators væntir því að sjá sem flesta. Þeim sem kjósa það að vera illa upplýstir og leiðinlegir er ráðið frá því að mæta.

Stjórn Orators

Miðasala á árshátíð Orators

Sun, 07 Feb 2010 22:18:00 +0000

Ágætu laganemar
Miðasala fyrir árshátíð Orators hefst á morgun í Lögbergi kl. 13:00. Selt
verður til kl. 17:00 sama dag.
Á þriðjudeginum verður selt í Háskólabíó frá kl. 9:00-11:30 og Lögbergi
frá kl. 9:00-17:00. Þá er miðasölu lokið.
Vinsamlegast athugið að 1. árið mun aðeins geta keypt miða í Háskólabíó á
þriðjudag fyrir hádegi en ekki í Lögbergi á sama tíma.

Miðaverð er 5900 kr fyrir Orator meðlimi en 6900 kr fyrir aðra. Fyrirfram
er borðum skipt eftir námsárum, og liggur það fyrirkomulag fyrir við
söluborðið. Gott er ef laganemar hafa gert einhver plön með hvaða
samnemendum sínum þeir vilja sitja.
Ef þið óskið eftir að fá grænmetisrétt á árshátíðinni í stað
steikarhlaðborðs þá verður að taka það fram við miðakaup.

Vinsamlegast hafið Orator skírteini meðferðis og sýnið tillitssemi og
þolinmæði við miðakaup.

Árshátíðarnefnd Orators

Fullt í kokteila - Beer pong keppni á Apótekinu á morgun

Thu, 04 Feb 2010 15:48:00 +0000

Ágætu laganemar,

Fullt er í báða kokteila helgarinnar.

Að loknum kokteilum verður farið á Apótekið og keppt í Beer pong keppni, 3 eru saman í liði og skráning fer fram á Apótekinu! Þetta verður rosalega gaman og við hvetjum alla til að taka þátt.

Einnig hvetjum við laganema sem ekki komust í kokteila til að hitta okkur á Apótekinu!

Skráning í kokteila hefst kl. 12:00

Wed, 03 Feb 2010 11:22:00 +0000

Skráning í kokteila hefst kl. 12:00 - Vinsamlegast smellið á slóðina kl.12:00 til að skrá ykkur: http://orator.is/skraningar-5-feb

Auka söludagur á Oratorvarningi

Mon, 01 Feb 2010 21:44:00 +0000

Ágætu laganemar,

Vegna mikillar eftirspurnar mun árshátíðarnefnd Orators selja Orator
varning á morgun í andyri Lögbergs.
Við hvetjum laganema sérstaklega til að kaupa sér grágás fyrir árshátíðina.

Oratorpeysurnar eru til í fjórum litum, rauðum, bláum, gráum og svörtum.

Hvetjum alla til að koma og kaupa sér peysu, fleyg, staup og fleiri góða
hluti!

Salan hefst kl. 9:00 í andyri Lögbergs!

Vinsamlegast athugið að suma hluti þarf að panta, en þeir verða tilbúnir
fyrir árshátíðina.

Kveðja,
Árshátíðarnefnd

Kokteilar á föstudaginn

Mon, 01 Feb 2010 21:40:00 +0000

Ágætu laganemar!

Seinustu kokteilar fyrir árshátíð verða haldnir á föstudaginn! Nú er um að gera fyrir alla að skella sér í dansskónna og fara út á lífið!

Sjálfstæðisflokkurinn býður 2-3 ári í kokteil til sín á föstudaginn. 50 manns komast að. 1 árs nemar eiga þó að vera viðbúnir því ef 2-3 árið fyllir ekki kokteilin fyrsta daginn verður opnað fyrir þeirra skráningar.
Grundvallarstefnumál og hugsjónir Sjálfstæðisflokksins koma fram í sjálfstæðisstefnunni sem flokkurinn hefur fylgt frá upphafi. Þegar Íhaldsflokkurinn og Frjálslyndi flokkurinn sameinuðust árið 1929 undir merkjum nýs flokks, Sjálfstæðisflokksins, var kveðið á um tvö meginatriði sem flokkurinn skildi hafa að leiðarljósi. Annars vegar var því lýst yfir að undanbragðalaust yrði að vinna að því að landið yrði sjálfstætt þegar skilyrði væru til þess samkvæmt sambandslögunum. Hins vegar sagði að flokkurinn ætlaði: „Að vinna í innanlandsmálum að víðsýnni og þjóðlegri umbótastefnu á grundvelli einstaklingsfrelsis og atvinnufrelsis með hagsmuni allra stétta fyrir augum."
Þessi kjarnyrta stefnuyfirlýsing hefur fylgt flokknum allar götur síðan og verið hans leiðarljós.

Skráning hefst miðvikudaginn 3. febrúar kl. 12:00 á innra neti Orators

Mastersnemar halda svo í kokteil hjá BBA legal, 50 nemar komast að og hefst skráning á sama tíma og í Sjálfstæðisflokkinn, kl. 12:00 á morgun.
BBA//Legal er lögmannsstofa sem leggur áherslu á alhliða lögfræðiþjónustu við innlend og erlend fyrirtæki og stofnanir. Meðal helstu viðskiptavina eru innlend og erlend fjármálafyrirtæki, stofnanir á vegum hins opinbera og fyrirtæki skráð í kauphöllum á Íslandi og erlendis.
Sérhæfing BBA//Legal felst í því að veita alhliða ráðgjöf við stofnun, fjármögnun og kaup og sölu fyrirtækja bæði hérlendis og erlendis. Þá hafa þeir yfirgripsmikla reynslu og þekkingu við gerð áreiðanleikakannana í tengslum við kaup og sölu fyrirtækja.
Á árinu 2008 veitti BBA legal rúmlega 40% þeirra fyrirtækja sem skráð eru í Kauphöll Íslands ráðgjöf. Auk þess sem þjónusta þeirra og ráðgjöf teygði anga sína til 26 mismunandi landa í heiminum.

Kokteill hjá Forum lögmönnum hefst kl. 18

Fri, 29 Jan 2010 09:38:00 +0000

Ágætu laganemar, kokteill hjá Forum lögmönnnum hefst kl. 18:00 í kvöld, en ekki 17:00 eins og áður sagði.

Biðjumst velvirðingar á þesssu.

Sjáumst hress í kvöld,

Stjórn Orators

1 sæti laus í Forum lögmenn

Wed, 27 Jan 2010 15:16:00 +0000

1 sæti eru nú laus fyrir laganema á 3-5 ári í kokteil hjá Forum lögmönnum á föstudaginn. Skráning fer fram á innraneti Orators eða með tölvupósti á orator@hi.is. Hægt er að fylgjast með skráningum á http://orator.is/skr-ir-kokteila/

Kokteill hjá Forum lögmönnum

Tue, 26 Jan 2010 18:58:00 +0000

Næstu helgi verður boðið uppá kokteil hjá Forum lögmönnum!
Þetta er í fyrsta sinn sem Forum lögmenn bjóða laganemum í kokteil svo við
hvetjum alla til að skrá sig.

60 manns komast að í kokteil hjá Forum lögmönnum og skráningin er hafin hér: http://www.orator.is/skraningar-29-jan/

Forum Lögmenn hófu starfsemi sína í desember 2004 í kjölfar þess að
lögmannsstofan flutti frá Klapparstíg í Reykjavík, en þar hafði hún verið
rekin undir nafninu Lögmenn Klapparstíg frá árinu 1989. Forum Lögmenn hafa
sérhæft sig á mörgum sviðum lögfræðinnar en viðskiptavinir þeirra eru allt
í senn fyrirtæki, einstaklingar og stofnanir. Markmið Forum Lögmanna er að
veita árangursríka þjónustu þar sem hagsmunir viðskiptavina þeirra ráða
ferð og lögð er áhersla á persónulega þjónustu og fagleg vinnubrögð.
Forum Lögmenn bjóða upp á alhliða lögfræðiþjónustu þar sem þeir hafa m.a.
sérhæft sig í innheimtu slysa- og skaðabóta, erfðarétti,
gjaldþrotaskiptum, verktaka- og útboðsrétti, samningarétti,
samkeppnisrétti, evrópurétti, fyrirtækjaráðgjöf, stjórnsýslurétti,
málflutningi o.fl.
Eigendur Forum Lögmanna eru fimm og hafa þeir allir réttindi til
málflutnings fyrir Hæstarétti.

Að kokteil loknum verður haldið á Apótekið þar sem aðrir laganemar eru
hvattir til að hitta okkur og skemmta sér langt fram eftir kvöldi!

Fullt í kokteil 1.árs

Thu, 21 Jan 2010 12:38:00 +0000

Ágætu laganemar,

Nú er fullt í kokteil 1. árs og biðlisti í kokteilinn. Við viljum því minna 1. árs nema á það að tilkynna forföll á orator@hi.is eða til skemmtanastjóra svo að næstu komist að.

Hægt er að fylgjast með skráningu með því að fylgja eftirfarandi slóð: http://orator.is/skr-ir-kokteila/